Og der ute ligg Vigra flyplass! sa eg til henne som stod ved sidan av meg ute på Alnes. Eg sa det sjølvsagt med framand tunge sidan ho var frå eit anna land. . . . Men nei, du skulle no berre ha sett det underlege blikket ho da sende meg. Viagra? sa ho, på framand tunge ho og sjølvsagt, og såg granskande og undrande på meg - med eit tydeleg drag av skepsis og frykt i augene. . . . . Eg rodde meg noko harkande heim i støa medan ein let av to tredels regjeringsfarge breidde seg frå halsen og rundt i andletet – og takke meg til at eg er så tilgrodd at det mest ikkje syns. Eg lot klokeleg vere å fortelje henne meir om forskjellen på desse tinga. Det er så lett å rote seg heilt på viddene veit du, for korleis skal eg forklare på framandlandsk at vi sunnmøringar tek til Vigra når vi har reising føre, at reising ikkje er det same som . . . ja, du skjøner . . og ja at ehem . . . . Nei, eg droppar dette temaet, og finn heller fram eit uskuldig bilete av skyer.